Book Reviews

کَسّ گَبرّے پہ گاری ءَ نئیل اِیت: عبدالحلیم

ہمے زوتاں چہ بلوچی اکیڈمی کوئٹہ ءِ نیمگ ءَ  انگریزی زبان ءِ گِدارُک “Stealing the Hills” بلوچی زبان ءِ ورنائیں رجانکار جمال بلوچ ءَ “کَسّ گَبرّے پہ گاری ءَ نئیل اِیت،”  نام ءِ سر ءَ رجانک کُتگ، چھاپ ءُ شنگ کَنگ بیتگ۔
اے گِدارُک ھبدہ بھرانی تھا اِنت۔ کتاب ءِ شونکار ءِ  نام “جوزن پائن پینے” اِنت کہ چہ برطانیہ ءَ سیادی داریت۔ جوزن پائن پینے جنین ءِ، ءُ برطانیہ ءِ  یک جوانین ءِ گدار، آزمانک ءُ تامُر نویس ءِ زانگ بیت۔
گِدارُک ءِ کارست دو دزگوہار اَنت کہ اِشانی نام سوسن ءُ جولی بنت۔ سوسن ءُ جولی یک زیبناکیں میتگے ءِ نندوک بنت۔ اے میتگ ءِ ابرمی رنگ وتی مٹ وت بیت۔ میتگ ءِ دیمی نیمگ ءُ یک پراہ ءُ شاھگانیں کوھے مک اِنت۔ کوہ ءِ دلبند ءَ پارک ءِِ جوڈ کنگ بیتگ کہ نام ئے  “کٹری پارک” اِنت۔
زیبناکیں “کنٹری پارک” ءَ چہ ابید اے میتگ ءَ وشیں آپ ءِ کور ہم تچ اَنت۔ میتگ ءِ دگہ یک زیبناکی یے  اد ءَ وڈ وڈیں ءُ وشتامیں نیوگ ءُ سبزی ءِ باگ اَنت۔ ہر جاہ کہ روئے دل ءَ تاھیر رس ایت۔
اے میتگ ءَ سُوتکال کَہن جَنی بزاں Coal Mining ءِ کہن ہم است اَت کہ ہمے میتگ ءِ مردم پوریا گری کن اَنت ءُ وتی لاپ ءَ کشّ اَنت۔
زوت یک ھستو مندءُ سیریں مردمے کہ آئی نام بیچ بیت ہمے میتگ ءَ کیت ءُ ہمے سُوتکال کَہن جنی ءَ بھا زیرایت۔ بیچ میتگ ءِ مردماں باور کنائین ایت کہ سُوتکال ءِ کَہن پہ میتگ ءِ مردماں وش بہتی  کارایت ءُ اد ءِ مردم سَر ء روزگار بنت۔ نیز گاری ھلاس بیت۔ وشیانی یک نہ کُٹوکیں در یے  پہ مردماں پچ بیت۔ بیچ ھمے میتگ ءَ یک بلائیں سپر مارکیٹے ہم جوڈ کنت۔
بلے دومی نیمگ ءَ دویں دز گوہار سو سن ءُ جولی بیچ ءِ مکر ءُ پریباں سرپد بنت ءُ اے ھوالہ ءَ گوں بیچ ءَ تپاک نہ دار اَنت۔ زوت سوسن ءُ جولی ءِ گمان کہ دوئیناں پہ بیچ ءَ داشتگ اَت پدر بنت۔ بیچ وتی سپر مارکیٹ ءَ گران نہاد ءَ چیزاں بہا کنت۔ سُوتکال ءِ کہن ءَ کار کنوکیں پوریا گراں شری رنگے ءَ مُز ہم نہ دَنت۔
انچوش وھد گوزان بیت۔ سُوتکال ءِ کہن ءِ کار گیش بیان بیت۔ سُوتکال ءِ کہن ءَ چہ در اتکگیں دیتکاں چہ بازار ءِ ابرمی رنگ اثر مند بیت۔ باگانی کشار مران بنت۔ کورانی آپ سیاہ چک بنت۔ شپ تاں روچ دیتکانی جمبر میتگ ءَ ساھیل کن انت۔ چُک تا مزن درست نادراہیءِ آماچ بنت۔
سوسن ءُ جولی شور کن انت۔ پدا زھرشانی درشان کن انت۔ بلے میتگءِ مردم سوسن ءُ جولی ءَ گوں ہمراداری نکن اَنت۔ اگاں کسے بیچ ءِ زوراکیانی ءِ باروا ءَ گپ جنت گوڈا بیچ ءِ زلمانی شکار کنگ بیت۔ بلے سوسن ءُ جولی بیچ ءِ بیھاراں پُشُت ءَ نہ کنز  اَنت ءُ وتی جھد ءَ برجاہ  دارانت تاں ہما وھد ءَ کہ سوبین نہ بنت۔ بیچ مردماں لالچ ءُ لب دنت، بلے سوسن ءُ جولی ءَ بہا زیریگ ءَ ھچ وڈ ءَ سوبین نہ بیت۔
یک روچے کئیت کہ سوسن ءُ جولی ءِ جھد ءَ سر جمیں ہلک سر پد بیت۔ ھالتاک ءُ ٹی وی ءَ بیچءِ سِل کاریانی بابت ءَ دگنیا سھی ءُ سرپد کنگ بیت۔ میتگ ءِ مردم سما ءُ سسا کن انت۔ سوسن ءُ جولی ءِ جھد سوبین بیت۔ بیچءِ زلمانی روچ آسر بیت۔ بیچ میتگ ءَ یلہ کنت ءُ روت۔ پدا میتگ وتی ابرمی رنگ ءَ کئیت۔ وشیانی جمبر میتگءِ سر ءَ ساھیل کن انت۔
اے گِدارُک ءِ وانگ ءَ رند ہمے گمان بیت کہ اے کسہ مئے چاگردءِ ھستیں جاور ھالاں گوں بندوک اِنت۔ بلے اے کسہءِ وانگ ءَ چہ ابید یک چیزیے اے سرپدی ہم رست کنت کہ چاگردءِ تہا بدلی آروکانی تعداد بِلّے توری کم بہ بیت، بلے اگاں اِشانی ارادہ مھکم بہ بنت تہ گڈا وھد ءِ ترندیں شھمات ءُ لب ءُ لالچ اشانی ارادہانی دیم ءَ بند بست نہ کنت۔ انچوش کہ اے گِدارُک ءِ کارست سوسن ءُ جولی کن انت ءُ پیش دار اَنت۔
گُڈ سر ءَ جمال بلوچ ءَ مراد بات دیاں کہ آئیءَ پہ جوانی اے کِسہ رجانک کُتگ ءُ پہ وتی چاگرد ءَ یک جوانیں کلوھے دیگءِ کوشست ہم کُتگ۔
Share

2 COMMENTS

LEAVE A RESPONSE

Your email address will not be published. Required fields are marked *