Art & Literature

مُرتگیں شیر ہم لیڑہ ئی بارے(نْدر پہ سبزل سامیگی ءِ اَرواہ ءَ ): شگراللہ یوسف

گوں سبزل سامیگی ءَ منی گُڈّی گند ءُ نند ماں چاہسر(تربت) ءَ یک پُرسے ءِ سرءَ بوتگ ات کہ کساس چہ سے کلاک ءَ گیش گوں سبزل ءَ نند ءُ نیاد کت، ما یکّیں پرزونگ ءَ نان ہم وارت۔ ہمے نندو نیادءِ دَہ پانزدہ روچ ءَ رَند منا ہال سر بوت کہ سبزل نادُراہ اِنت ءُ کراچی ءَ نادراہجاہ ءَ تَہت ءِ باہوٹ اِنت۔ پدا نوہ (9) نومبرءَ آئی ءِ بیرانی ءِ بدیں حال اَتک۔

سبزل سامیگی ءَ وہدءِ شیرکنی ہم چشتگ اَنت ءُ زند ءِ زَہریچک ہم نوش اتگ اَنت ۔ آ یک نیزگاریں لوگے ءَ ودی بوتگ۔ سبزل ءِ کسانی پہ پوریاگرے ءَ گوستگ، ہستومندانی بورچی پان بوتگ، آہانی لوگاں کسانیں کارئے کتگ انت ۔ سبزل درکسانی ءَ پہ سوت ءِ جنئگ ءَ ہدوکناک بوتگ ءُ توار ءِے سک وش بوتگ، پمیشا آئی ءَ ہَند ءُ میتگی دیوانان زہیرونک ءُ سوت جتگ۔ پداآئی ءَ نیشنل بنک تربت برانچ ءَ چپراسی ءِ جَہت ءَ کار کتگ ۔ہمے کارءِ دوران ءَ وہدے نیشنل بِنک تربت برانچ ءِ منیجر (کہ آئی ءِ نام ناصر بیت) ٹرانسفر کنگ کوئٹہ ءَ بزاں شال ءَ راہ دیئگ بیت۔ گڑاں منیجر وتی لوگ ءِ دُراہیں سامان و اَزباباں یک لوڈِینگ (ٹرک) یے ءَ مان کنت ءُ گوں سبزل ءِ پاسبانی ءَ شال ءَ راہ دنت۔سِہمی یا چارمی روچ ءَ سبزل شال ءَ سر بیت ۔ آ منیجرءِ سامان ءُ ازباباں شال ءَ آئی ءِ لوگ ءَ سر کنت بلے وت کیت واجہ یوسف عزیز گچکی ءِ گْورءَ جَلّیت۔ واجہ یوسف عزیز اے وہدءَ شال ءَ وانگ ءَ بیت ءُ ہاسٹل ءَ نندوک بیت (واجہ یوسف عزیز گچکی شائر، پولکار ءُ بلوچی ءِ مزنیں نامے)۔

واجہ یوسف عزیز چہ پیسرا سبزل ءِ وشیں توار ءَ آژناگ بیت ، پمیشا آئی ءَ را شال ءِ ریڈیو اسٹیشن ءَ کواس و زبان زانت ءُ آ وہدءَ ریڈیوءِ اسسٹنٹ ڈائریکٹر واجہ بشیر بلوچ (ہُدا مرزی) ءِ کرءَ پہ آڈیشن ءِ دیئگ ءَ بارت ۔ سبزل ءَ گُشندہ کارے ءِ اِزم چہ کس ءَ ہیل نہ کتگ ۔ پمیشا چہ آڈیشن ءَ رَند بشیر بلوچ ءِ گُشگ ءِ پدءَ ریڈیو ءِ لوٹ ءُ گزر ءُ ٹیکنیکل ہُنر ءُ ازباباں چے چَٹ ناآشنا ئیں سبزل مزن نامیں گُشندہ فیض محمد بلوچ (ناکو پیزُک) ءُ استاد ستّارءِ دست ءَ دیئگ بیت، کہ آ پہ ریڈیو ریکارڈنگ ءَ سبزل ءَ را تیار بکن اَنت ۔ چہ سوہو کنگ ءَ پد ریڈیو اسٹیشن شل ءَ سبزل ءِ توار ءَ چار سوت ریکارڈ کنگ بیت کہ چہ آ سوتاں یکے ایش اِنت ’’ منا آسیگوں مکن دردانگ، تئی عشق کت منا دیوانگ‘‘ ، ءُ دوہمی ’’ مَہری شُمئے لنگ باتاں منی جانی ، پرچا شُتئے گوں براتاں‘‘ ۔ اے 1967؁ء ءِ سال بیت ۔ اے سوت وہدے چہ شال ریڈیو اسٹیشن ءَ شِنگ بنت گُڑاں سبزل ءِ سوت دُرسیں سوتانی ریکارڈ ءَ پروش اَنت ، کہ چہ سبزل ءَ پیش ءُ چہ سبزل ءَ رَند چُشیں وشنامی ءُ مہلوک ءِ ہدوکناکی داں اَنگتہ دگہ ہچ بلوچ گُشندہ ءِ بَہت ءَ نہ اَتکگ ۔ گُڑاں سبزل بنک ءِ نوکری یلہ دنت ءُ پہ مُدامی زیمر ءِ گْورم ءَ دور کنت۔ (اے ہبر گوں من سبزل سامیگی ءِ جندءَ ءُ واجہ یوسف عزیز گچکی ءَ گْوشتگ اَنت)۔


وہدے پاکستان ٹیلی وژن (پی ٹی وی) چہ کراچی ءَ بلوچی ساز ءُ زیملی پروگرام بندات کنت گُڑاں الیکٹرونک میڈیاءِ اے نوکتریں پِڑءَ سبزل ءِ سوت ءُ زہیرونک ہم جِیسک اَنتءُ پہ ساز ءُ زیملءَ ہدوک ءُ تُنّیگیں ہمک مردم ءِ تُنءَ ایرمات کن اَنت۔ باجا ءُ ریل ءِ دورباریگ کیت گُڑاں سبزل ءِ توار ہمک مردم ءِ دزرسءَ کیت ءُ ہمک لوگءَ سبزل ءِ توار مانشانیت ءُ ہرکس دلءَ میلءِ سبزلءَ گوشداریت۔ سور ءُ آروسی دیواناں ، ملکی ءُ ہَندی پُرمڑاہیں زیملی مراگش ہم چہ اَبیدءِ سبزلءَ ناسرجم لیکگ بنت۔ یورپ ءُ عربستان ءِ ملکانی ہواریءَ دگہ بازیں دَری ملکاں ہم سبزل ءَ وتی اِزم درشان کتگ ءُ داد گپتگ۔ کساس 1960؁ء ءَ بگر داں 1980 ءِ بندات ءِ بلوچی سازوزیمرءِ وہدو باریگ سبزل سامیگی ءِ دور اِنت۔ اے ہما دور اِنت کہ سبزل بَہر نبوتگ۔ لوٹوکاں سبزلءَ را گوں زَرءَ تور اِتگءُ سبزلءَ گوں زَر ءُ کلداراں لیب کتگ۔ اے وہداں سبزل سک سیر ءُ ہستومند بوتگ، زمین ءُ جائیدادانی واہُند بوتگ۔ چہ زند ءِ تہلی ءُ سکّیاں آژناگیں سبزل دست پچیں مردمے بوتگ ءُ وتی وہدءَ نزور ءُ واریں مہتاجانی مالی کمک انچیں پیمیءَ کتگ ءِے کہ کس چہ کسءَ سہی ہم نبوتگ۔ بازیں نیزگاراناں لاپ داتگ ءُ آہانی زہگانی سور آروسانی ہرچ ہم کَش اِتگ۔

بلے گُشاں کہ وہد یک کرارءَ نہ اوشتیت! ہمک اِزمکار ءِ زندءَ بُرز ءُ جَہل کائنت۔ 1980؁ء دِہائی پہ بلوچ راجکاری ءُ راجی جُنزءِ ہواریءَ لبزانت، زانشتی، سساساچی ءُ اِزمی داب ءُ دودانی مَٹ بوئگ ءِ دور لیکگ بیت۔ چوشکہ بی ایس او ءِ پتّرءَ بلوچ ورناہانی گوں سوشلسٹ ءُ کمیونسٹ کچ ءُ کیلواں ءُ گوں سویت یونینءَ ہمگرنچیں راجکاری، دَری لبزانکی نکان ءُ ساچستانی ماں بلوچی ءَ رجانکاری، شائری ءُ لبزانکی چاگرد ءُ بنگپانی مَٹ بوئگءُ نوکیں تہر ءُ دابانی بُنگیج بوئگ۔ ہمے دورءَ بلوچ ورناہ گل(بی ایس او) ءِ چیردستیءَ جم داشتگیں ساز ءُ زیملی مراگشانی تہا نوکیں دابءِ آشوبی سوت ءُ پِربند ۔ ستار بلوچ ، ولی محمد بلوچ ءُ نوک باہندیں نورل محمد نول ءِ آشوبی پِربند ءُ نوکیں تہرءِ دستونکی سوتاں بلوچی ساز ءُ زیمرءَ را یک اَنچیں رنگ ءُ دروشمے دات کہ چہ وانگ ءُ نبشتہءَ سرجمءَ زبہر ءُ ناآشائیں زہیرونک ءُ نازینک ءُ گیدی گوناپءَ سوت الہان کنوکیں سبزل سامیگیءَ سازو زیمرءِ اے نوکیں دورءِ رواجاں اَتک نہ کت ءُ آ پشت کپت ۔ چیاکہ نوک ورناہیں اوبادگانی تَب مَٹ بوتگت، چاگرد ءِ تب و میل دگہ دابے ءَ رُدوم زُورگءَ اَتنت۔ پمیشا نوں زیمری مراگش ءُ دیواناں سبزل ءِ لوٹ کم تر اِتگ اَت۔ ریل (کیسٹ) ءُ نوارانی تہا ہم نوکیں گُشندہانی تَلب ود ّیت۔ اے جاورہالءَ میزاں میزانءَ سبزل ءَ مالی رِدا ہم نزور تَرّینت۔ تیار ءُ زوراوراں سبزل ءِ کَٹ اِتگیں زمین ءُ جائیداد انی سرا ہم ملکیتءِ داواءَ کت ءُ بازینے چہ سبزل ءَ پُلگ بوت۔ سبزل ءِ سرءَ جنگے ہم کپت ءُ آ انچوش لاچار ءُ بزّگ بیت کہ پہ وتی ءُ چُک چلانگانی زندءِ رکّینگءِ ہاترا کیچ ءِے یلہ کنت ءُ مزنیں مُدّتیءَ ایران ءَ روت بزاں روبرکتی بلوچستانءَ باہوٹ بیت۔

پدا یک انچیں ہم وہدے کیت کہ سبزل ’’نئیّا کُنڈی ءِ مرد بوت‘‘، بزاں چہ آئیءِ دستءَ دُرس رَونتءُ پیراں سَری پدا ہما پوریاگر ءُ بورچی پان جوڑ بیت۔ سبزل ءِ اے واری ءُ بزّگی ہمک بلوچ راجدوست ءُ زبان دوست ءِ دلءَ سُرین ئیت، بلے کس پہ آئیءِ کمک ءَ توکل نہ کت۔
منا یات اِنت ( 2000؁ء ءِ دہائی ءَ ) بلوچ آزمانکار حنیف شریف ءَ ہمّت کت ءُ پہ سبزل ءِ کُمکءَ لانک بست۔ حنیف شریفءَ سبزل ءِ نام ءِ اسٹیکر جوڑ کت ءُ بہا کت اَنت ، یک مزنیں زیمری مراگشے جم داشت، ایشانی زَر سبزل ءَ را دات اَنت داںکہ آ کمو آسودگ بہ بیت۔ بلے منا اے ہم یات اِنت کہ ہمے زیملی مراگشءَ لہتیں ہپتگ پد یک روچے گوں سبزلءَ یک گند ءُ نندے ءَ آئیءَ گوں من حنیف ءِ زَنگ جت کہ’’ حنیف ءَ منی نامءَ بلاہیں پروگرامے کتگ، بلے لہتیں زَرّ ءَ ابید آ دگہ دُراہیں زَر حنیف ءَ گوں سنگتاں وارتگ اَنت‘‘۔ گڑاں پدا من ہمے گلّہ ءِ جُست گوں حنیف شریفءَ کت(چیاکہ من اے بابتءَ حنیف ءَ زانتگ اَت، پمیشا منااے ہبر سرجمءَ باور نبوت اَنت)گڑاں حنیف شریف ءَ مزنیں ٹَہکے جت ءُ دَرّائنت کہ’’ شگراللہ تئی ہیال ءَ من کدی ناکوءِ زَرّاں وارت کناں!؟‘‘ حنیف ءَ گُشت ’’ لہتیں مردماں سبزل ءَ را باپرینتگ کہ حنیف ءَ چہ اے پروگرام ءَ باز زَر کّٹ اِتگ ، بلے ترا کمّو داتگ اِش ءُ آدگہ زر اِش وت زُرتگاں۔ پدا ناکو سبزل آہانی گپّاں باور کنگا اِنت، آ گوں ہر کس ءَ منی زنگ ءَ جنت۔

بلے ایوکا اسپیکر و سائونڈسسٹم والا ہانی باڑہ ءُ انتظامی کارندہانی ورگ ءِ ہرچءَ اَبید من یک پَیئوکے ہم نہ زُرتگ۔ درسیں زَر ناکوسبزلءَ را داتگنت۔ بلے ناکو نیگ بَہت سرپد نبوئگا اِنت‘‘ ۔ حنیف ءَ اے بابتءَ درسیں گپ ءُ گپانی پُژدر ہم منا گُشت اَنت۔ منا حنیف شریف ءِ گپ سرجمءَ باور بوت اَنت۔ چیاکہ من زانتگ اَت کہ مئے چاگردءَ ہرکس کہ شرّیں کارئے کنت ، آ بہتامانی دیمپان بیت۔ چہ حنیف ءِ گپاں من دلجم بوتاں کہ زرّانی ورگءِ گپ ایوکا بہتامے ۔
بلوچ سرڈگار ءَ ایوکا شاہی تبیں زہم جنیں پُسّگ پیداک نہ کتگ، بلکیں بلوچ راج اِزم ءُ ساچست ءِ پِڑءَ ماں جہان ءَ پستاریءِ واہُند اِنت۔ بلوچستان ءِ ہمگ دمگ ءُ ہَندءِ سازءُ زیمر ءُ گُشندہ کاری ءِ جِتا جِتائیں تہر اَنت کہ آ پراہ ءُ شاہیگانیں بلوچ ڈیہہ ءِ رنگ ، زید ءُ دروشماں تالان کن اَنت۔ تُوران، کچ گندواہ، جہلاوان، کوہِ سلیمان، رخشان ءُ مکران ءِ زیمرءِ جتا جتائیں رنگ اَنت کہ آ سدانی ہِسابءَ اَنت ۔ سلیمانی ، رخشانی ءُ مکرانی گالوارانی زیمری الہان ءِ وتی جتائیں داب ءُ دروشم اِنت کہ ہما دمگءُ جاہ ءِ موسمی جاور، گواچن، کٹ ءِ وسیلہ ، دودمان ءُ زندمان ءِ ڈولداریں ہَندی تپاوت ءُ رنگ ءُ چیدگاناں شان دیئنت ءُ درشانءَ کن اَنت۔ ہمے وڑا سبزل سامیگی ءِ اِزم ، توار ءُ زیمری داب ءُ درشان گیشتر گوں کیچ مکران ءِ دودمان ءُ زندمان ءِ دُراہیں رنگ ءُ دروشماں گوں ہمگرنچ اِنت ( سرکارءِ ناپ کتگ ءُ کیشینتگیں مکران ڈیژن ءِ گپّ نیاں)۔

پمیشا گیشتر کیچ مکران ءِ مردمے دگنیاءِ کُجام ہم کُنڈیءَ نشتگ ، سبزل ءِ سوت آئیءَ را الّما وتی بُنکی ہنکین، ہلک ءُ میتگانی ، کوہ ءُ کُوچگ، کور ءُ شاہجوہ، زید ءُ موسم، نند ءُ نیادنی ترانگاں پِرّین اَنت۔ سبزل ءِ گْشتگیں سوت ءُ نازینک ٹوہیں شائری ءُ نوکیں دستونک و گالانی تُشے ہم وازمندگ نہ اَنت۔ آئی ءِ سوتانی تہا کارمز بوتگیں شائری لوک) گیدی رنگ ءَ انت ، پمیشا سک اَرزان ءُ لس پہم انت، ءُ گوں بلوچ سر ڈگارءِ ہاک ءُ بوہ ءَ ہمگرنچ ءُ آتار انت۔( پمیشا آئیءِ جتگیں سوت ، نازینک ءُ زہیرونک پہ وتی زمین ءُ زبانءَ زَروکیں ہمک بلوچ ءِ دل ءَ انگیر کننت ، واہگ ءُ مارشتاں ترہین اَنت ۔
سبزل سامیگی ءَ وتی اِزم ءُ سساساچی زِندءَ دو اَنچیں کار کتگ کہ دگہ ہچ بلوچ گشندہ ءُ ازمکاراں کت نہ کتگ۔ چہ آہاں یکّے ایش کہ سبزل ءَ گشندہ کاری ءُ زیمرءِ پِڑءَ یک انچیں جتائیں تہرے سازتگ ءُ جوڑکتگ کہ آ ایوکا ’’سبزلی تہر ‘‘ گُشگ بیت ۔ پیسریگیں ءُ انّوگیں وہدءِ بازیں مزنیں گُشندہاں اے تہرءِ گیگانی کتگ ، بلے آ سوب مند نبوتگ اَنت۔ دوہمی ایش کہ بلوچی ساز ءُ زیمرءِ رِدا گیشتریں گُشندہ گچینیں ٹِک ءُ ٹولیانی اِزمکار بوتگ اَنت ءُ ہست اَنت۔ بزاں لہتیں گُشندہانی گوشداروک وانندہ ءُ سرپدیں ٹَک اَنت ، لہتینانی جَتگیں سوت ءُ گال ایوکا لبزانت ، شائر ءُ کواساں دوست بنت، بازیں گُشندہانی لوٹوک گیشتر ورناہ ٹَک بیت، ، لہتین گُشندہانی سوت جنین آدمانی گْورا نامدار بنت، ہمے وڑا لہتیں گُشندہانی گوشداروک ایوکا پوریاگر، دہکان ءُ مہتر، شوانگ ءُ کماش بنت۔ بلے سبزل سامیگی وتی وہد ءِ یک ءُ تہنائیں اِزمکار بوتگ کہ آئیءِ گوشداروک ایوکا یک ٹَکّے یا ٹولی یے نہ بوتگ۔ پیر ، ورناہ، وانندہ ، بے وانندہ ، جنین آدم، پوریاگر، شپانک ، دہکان، لبزانت، کواس، پوہ ءُ سرپدیں مردم ءُ گوں زندءِ ہمک پِڑءَ ہمگرنچیں ہمک مردم ءُ لس مہلوک یک پیمءَ پہ سبزل ءِ سوتاں ہدوکناک ءُ نیاز بُند بوتگ اَنت ۔
بلوچی ءَ گُشنت کہ ’’ مُرتگیں شیر ہم لیڑہ ئی بارے‘‘۔

لہتیں انچیں کارست بنت کہ آہانی نام ءُ توار زمانگءِ ہمبراہی جَہل کپ اَنت ، بلے وہد ءِ دنز ءُ مُج آہانیءِ اِزمی کرد ءَ را پہ مدامی اندیم ءُ گار کت نہ کن اَنت۔ ہزاراں ’’موسمی اَزمکار‘‘ کائنت ءُ روانت ، بلے چَندے کارست ءُ زمکار راجدپتر ءَ اَبدمان بنت۔ چوشکہ ہندوستان ءِ اِزمکار دلیپ کمارءُ لتا منگیشکر، کہ انّوگیں وہدءَ آ کپتہ کار اَنت ءُ آہانی نوکیں ہچ اِزم دیما نیاآہگا انت، چہ ایشاں رند سد ءُ ہزارانی کساسءَ ازمکار اَتکگ ءُ شُتگ، بازین ءَ نام ہم درآئورتگ ۔ بلے اے نوکیناں دلیپ ءُ لتا ءِ بستار ءُ کردءَ را تُشے ءَ ہم کمتر یا جہل تر کت نہ کتگ، اِزمءِ راجدپتر ءَ اے انگتہ چہ دُرساں سَوائی تِر اَنت۔ چیاکہ لہتیں انچیں کلّانہیں مردم ءُ کارست یا ازمکار بنت کہ آہانی نام و توار ، بستار ءُ اَرزشت زمانگ ءُ دور ءِ مُہتاج نہ بنت، آ چہ وہد ءِ سیمسراں آجوہ بنت ، ءُ ہما زمانگ آہانی نام ءَ گیر آرگ بیت ۔ دور ءُ باریگ ءِ جند ہما کارست ءُ ازمکار ءِ برکتءَ ماں راجدپترءَ وتارا ابدمان کن اَنت ۔ سبزل سامیگی ہم چہ ہمے وڑیں کارست ءُ ازمکاراں یکّے۔ سبزلءِ گوشداروک ءُ لوٹوک مروچی ہم بے کساس ءَ ہست اَنت۔ بلوچ ڈیہہ ءَ ءُ دراں ڈیہاں نِشتگیں ہزاراں لکّاں بلوچ پہ سبزل ءِ سوت ، نازینک ءُ زہیرونکاں زَروک اَنت۔

سبزل سامیگی مروچیگیں زمانگ ءَ ہم گوشدارگ بوئگا اِنت ۔ اے گوشداروکانی تہا ورناہانی ہم مزنیں کساسے ۔ وہدے 6 اکتوبر 2018؁ء ءَ تربت شاہ دربرجاہ (تربت یونیورسٹی) ءَ گوں ’’بلوچی میوزک پروموٹرز سوسائٹی‘‘( کہ آ وہدءَ اے گل ءِ نام’’ بلوچی سازءُ زیمری دیوان ‘‘ اَتءُ ہم حیالیں سنگتاتی ایوکا وٹسپ گروپے اَت) ءِ کمکءَ ماں تربت شہرءَ سبزل ءِ شرپ ءُ مالی کمک ءَ یک دیوانے کتگ اَت، گڑاں وہدے سبزل کہ مائیک ءِ دیما اَتک ءُ وتی سوت الہان کت اَنت ، نوک ورناہانی جبزگ ءُ ہدوناکی ءَ دُرساناں ہبکّہ کت ، ءُ اے بتل کہ ’’مرتگیں شیر ہم لیڑہ ئی بارے‘‘ گُشئے گوں وتی سرجمیں ڈیل ءُ بالاد منی دیما اَتک ءُ مِک بوت۔ پہ اے زیملی مراگشءَ من سک وش ءُ گل اَتاں۔ چیاکہ مئے مردگ پرستیں چاگردے ءِ تہا ’’ چند زندگیں مردماں‘‘ اولّی رَندءَ یک زندگیں اِزمکارےءِ مالی کمک ءِ ہمراہی جُلگہیں اِیلگیم ءِ دیما شرپ دات ءُ ساڑات ۔ پہ اے زیملی مراگش ءِ برجم دارگءَ پروفیسر عبدالصبور احمد بلوچ ،گلزار گچکی ، بجّار بلوچ ءُ آدگہ زبان دوستیں سنگتاں مزنیں کردے پیلو کتگ اَت۔ اے واجہاں نوکیں دودے بنگیج کت کہ آ پہ کُلّیں زبان دوستاں یک سکین ءُ شونے اَت۔
بتلے کہ ’’ لُرد ءُ نوکاپیں چمّگءِ کانیگ، بیت ئیں سبزآپ ءُ سَنگریت روچے‘‘ ،کیت اَنچیں وہدے کہ مئے اِزم ءُ سساساچ ءِ تاسءَ مان اَتکگیں دَری ءُ دَرامدیں بُوچ ءُ لیگار سَنگر اَنت ، بلوچ اوبادگ چہ فیض محمد بلوچ، مرید بلیدئی، حانی بلوچ، مُلّا کمالان، مزار ابراہیم ، عبدال غیّاث ءُ تُوتی تواریں سبزل سامیگی ءِ اِزم ءُ الہانی داب ءُ درشمانی کُمک ءَ پدا وتی جندءِ ہاکءَ رُدوم زُرتگیںءُ گوں بلوچ دودمان ءُ گیدیءَ ہمگرنچیں اِزم ءُ ساچستاں ءَ پدجننت ءُ زُورنت۔

بائدنت کہ زبان دوست ءُ گوں بلوچی زیمرءَ ہمگرنچیں استاد ءُ ہیلکار نوک باہندیں ازمکاراناں گوں سبزل ءِ اِزم ءُ تہرءَ آشنا بکن اَنت، داں کہ آ بلوچی زیمرءِ اَسل داب ءُ درشان ءُ بزان اَنت ،ءُ گوں وتی اِزم ءُ سساساچءَ ’’سبزل ئی تہر‘‘ ءَ را گوں نوکیں داب ءُ دروشماں ہمگرنچ بکن اَنت ءُ دیما بیار اَنت۔ بائدنت کہ سبزل سامیگی ءِ نامءَ یک انچیں ادارہے جوڑ کنگ ببیت کہ اُودءَ بلوچ ساز ءُ گشندہ کاری ءِ ہُنر ءُ اِزم ہیل دیئگ ءِ ہمبراہی بلوچی ساز ءُ زیمر ءِ ہمک تک و پہنات ءِ بابت ءَ پَٹ و پول کنگ ہم بہ بیت۔ بلوچ سیاسی نمائندہ و حاکمءُ سروک ، زبان دوستیں گل ءُ کلّانہیں مردم اے ادارہ ءِ بنگیج ءِ بابتءَ وتی کردءَ ءُ راجی ڈبُہءَ پیلو بکن اَنت۔

Share

LEAVE A RESPONSE

Your email address will not be published. Required fields are marked *