Report

سید ھاشمی ریفرینس کتابجاہ لس مجلس دیوان، گچینکاری ءُ نوکیں کابینہ ءَ سوگند زُرت

سید ھاشمی ریفرینس کتابجاہ لس مجلس دیوان، گچینکاری ءُ نوکیں کابینہ ءَ سوگند زُرت
سید ھاشمی ریفرنس کتابجاہ ءِ لس مجلس دیوان شہید صبا دشتیاری ءِ اکس ءِ سروگانی ءَ بندات بیت۔ کاگشاد بشیر بلوچ ءَ گوستگیں دو سالے نگدال ونت ءُ باسکاں سرپدی دات کہ کتابجاہ ءِ کابینہ ءَ گوستگیں دو سال کورس کمیٹی، دیوان، کتاب چاپ، کتاب زیرگ ءُ کچ ءُ کساس گشینت ءُ ماڑی ءِ جوڑ کنگ ءِ آترا سرکاری گلاں وتی لوٹ جم دات بلے کرونا ء، سوب ءَ کار پشت کپت ءُ نوکیں کابینہ ءَ چہ دست بندی کُرت کہ اشی ءِ رندگیری ءَ بنکت۔

کارگشاد ءَ پد کلیت دار (ھساب دار) ءَ وتی نگدال ءُ دو سالے ھساب پیش کرت۔ ھسابانی رد ءَ کتابجاہ ءَ دو سالے ءِ تہا دو لک، شست ءُ ھپ ھزار، دو سد سی پنچ کلدار درچ مُچ کرتگ ءُ گوستگیں دو سالاں کتاب جاہ ءِ ھرچ سیزدہ لک، نود نوہ ھزار ھشت سد، ھپتاد ءُ چار کلدار بیتگ۔ اے ھساب ءِ رِد ھرچ چہ درچ ءَ سک باز انت ءُ گیشتریں ھرچ کارمندانی پگار انت کہ کساس ھپت لک، ھپتاد ءُ دو ھزار کلدار بیتگ۔ ھسابدار سلمان بلوچ ءَ گوشت کہ باسک اگاں وتی باسکی بجاری ءَ جمّ بکناں مئے کوپگ سبک تر بنت۔

نگدالاں پد جُست پُرس کنگ بیت بازیں باسکاں کتابجاہ ءِ پشت کپتگیں کارانی سرا چمشانک دات ءُ وتی سوج ءُ پنت داتاں۔
کتابجاہ ءِ کماش ڈاکٹر رمضان بامری ءِ گُڈ سرا کُلیں باسکانی منت گپت انت کہ اے وائرس ءُ نادرائی ءِ جاوراں وتا سر اش کتگ۔

ڈاکٹر رمضان بامری ءِ منت ءَ پد کتابجاہ ءِ پٹپولکار واجہ غلام رسول کلمتی ءِ بزانت بلد ’’بلوچی گال گنج‘‘ ءِ دیمدرائی کنگ بیت۔ اے دیمدرائی واجہ رمضان بلوچ، عاصم زھیر، اسحاق خاموش، نواز فتع، شبیر رخشانی ءُ ڈاکٹر رمضان بامری ءَ گوں واجہ غلام رسول کلمتی ءِ پجّی ءَ کُرت۔

کتاب ءِ دیم درائی ءَ پد گچینکاری کمیٹی جوڑ کنگ بیت کہ آئی مستر واجہ اسحاق خاموش ءُ ائی باسک ھارون بلوچ ءُ ھمل ات انت۔ گچینکاری ءِ کمیٹی ءَ گچینکاری ءِ جار پِرّینت ءُ گڑ سرا وتی جار جت کہ ھما جاہاں کہ مقابلہ دیم پہ دیمی ءِ بیتگ چو کہ سلاہکار کمیٹی ءِ تہا ۵ مردماں وتی کاگد پدا زُرتگاں آیانی تہا جمال ناصر، بشیر بلوچ، سجاد علی، عمران اڈوکیٹ، خالد بلوچ ات انت۔ پمشکہ کُلیں اگدہ دار ءُ سلاہکار کمیٹی بے مقابلہ ءَ گچین بیت انت۔ اگدہدار ءُ سلاہ کار کمیٹی اے وڑ انت

ڈاکٹر رمضان بامری ۔ کماش
بانُک پروین ناز ۔ کمک کماش اول
واجہ اقبال ھاشمی ۔ کمک کماش دومی
واجہ سلمان بلوچ ۔ کارگشاد
واجہ اکبر ولی ۔ کمک کارگشاد
واجہ ظریف بلوچ ۔ کلیت دار
واجہ غلام رسول بلوچ ۔ آفیس کاردار
واجہ شرف شاد ۔ جارکَش
واجہ واحد کامریڈ ۔ رابتہ کاردار
سلاہکار کمیٹی باسک اے وڑ انت
بانُک ناز بارکزئی
واجہ عزیز کلمتی
واجہ عاصم زھیر
واجہ شبیر رخشانی
واجہ نواز فتع
واجہ قدیر مجید

دیوان ءِ گُڈ سرا گچینکاری کمیٹی ءِ مَستر واجہ اسحاق خاموش ءَ چہ کابینہ ءُ سلاہکار کمیٹی ءِ باسکاں چہ سوگند زُرت۔

Share

LEAVE A RESPONSE

Your email address will not be published. Required fields are marked *