Report

اوست ءِ دو سال ءِ سپر ءُ اوست ایجوکیشن فورم تشکیل: وپا بلوچ

بلوچ ءِ راجدپتر ءَ اوست اولی گھبودی گل انت کہ آئی ءَ چہ لس مھلوک ءَ بزاں چہ بلوچ راج ءَ کساس 50000000 (پنچ کروڑ) کمک جم کتگ ءُ بیوس ،لاچار ءُ تنگدستیں کینسر ،گردہ،دل،برین ٹیومر ءُ دگہ بازیں نادراہانی الاج ءِ واستہ ھرچ کتگ۔

اوست ءَ چہ ھمے کمکاں کرونا لاک ڈاؤن ءِ وھد ءَ گریب مھلوک ءِ لوگ ءَ راشن ھم سر کتگ ءُ بازیں وئیلانی وھد ءَ گریب ءُ تنگدستانی زر ءُ مالی کمک ھم کتگ انت۔
دو سال ءِ سپر ءَ اوست ءِ مستریں سوبمندی ھمیش انت کہ بلوچ مھلوک ءِ چاگرد ءَ ءُ اسپیشلی نوجوانانی توکا یک پکرے ودی کتگ کہ آ پکر ءِ نام “اوست” انت بزاں پہ وتی چاگرد ءُ راج ءِ واستہ یک اوستے جوڑ بوھگ مدام پہ وتی راج ءِ دیمروئی ءِ واستہ جد جھد کنگ۔ آ جھد پہ مھلوک ءِ جان سلامتی ءِ دروشم ءَ بیت یا کہ نودربرانی جیڑہانی ھلاس کنگ ءُ ھر بلوچ ءَ گوں یک علم ءُ زانت ءِ چاگرد ءَ گوں بندوک کنگ یا کہ ھما تبکہ ءِ واستہ جھد کنگ کہ زند ءِ بُنکی آسراتیاں چہ زبہر انت۔اے پکر ءُ سوچ بلوچستان ءُ دنیا ءِ کُنڈ کُنڈ ءِ بلوچاں شنگ ءُ تالان بوت کہ مرچی چہ ھرچ ھند ءُ دمگ ءُ ملک ءُ بازاراں پہ وتی راج ءِ کمک ءَ ورنا سنگت ءُ گھار ءُ واجہ ساڑی انت۔

نادراہانی الاج ءُ کمک ءَ ھوار اوست ءِ ھرچ باسک ءِ مدام جھد ھمے بوتگ کہ “اوست” ءَ ما پہ بلوچ راج ءَ یک مھکمیں راجی ادراھے جوڑ بکن ایں کہ آ مستقبل ءَ اسکول،ھسپتال،بلڈ بینک،ایمبولینس سروس، جوڑ کت بہ کنت ءُ لاچاریں مھلوک ءَ روزگار دات کت بہ کنت۔۔
بلڈ بینک ءُ ایمبولینس سروس کمیٹیاں وتی جد جھد دیما برتگ انت ءُ زوت بنگیج کنگ بنت ءُ چہ اوست ءِ نیمگہ زوت ایجوکیشن ءِ واستہ جھد بندات کنگ بیت۔

“اوست ایجوکیشن فورم”
اوست ءَ اے گپ چہ اولی روچ ءَ مار اتگ کہ علم ءُ زانت ایجوکیشن ءُ تعلیم ھرچ راج ءِ دیمروئی ءِ راز انت بلوچاں درستاں گیشتر علم ءُ زانت ءِ زرورت انت یک وانندہیں چاگردے ءِ زروت انت پمشکہ چہ روز ءِ اول ءَ اوست ءِ ٹارگٹ ہیلتھ ،ایجوکیشن ءُ لاچاری ءِ ھلاس کنگ انت ءُ ھرچ فورم ءِ جھد پہ وھد بندات بنت۔
اوست ءِ ملک ءُ درملک ءِ نمائندہ مرکزی ءُ مشاورتی کمیٹی ءِ شور سلاہاں چہ پد زوت “اوست ایجوکیشن فورم” تشکیل دیگ بیت۔

اوست ایجوکیشن فورم بلوچ چاگرد ءَ علم ءُ زانت ءِ شنگ ءُ تالان کنگ ءِ واستہ گوں جتا جتائیں پروگرامانی دروشم ءَ وتی جھد ءَ گوں دیما جنزان کنت بلوچی زبان ءِ دیمروئی ءِ واستہ ھم جد جھد کنت ءُ گُڈسر ءَ دانکے اوست اکیڈمی بنگیج کنگ بیت۔

اوست ایجوکیشن فورم ملک ءُ درملک ءِ علم دوست ءُ راج دوستاں گوں دزبندی کنت،نودربر ءُ نوجواناں گوں دزبندی کنت، اے جھد ءَ گوں وتارا ھوار بکن ات اے فورم ءَ گیش ءَ چہ گیش مھکم بکن ات دانکے مئے ءُ شمے ھرچ ھلک ءُ بازاراں گریب ءُ لاچاراں علم ءُ زانت سر بہ بیت دانکے مئے ءُ شمے آوکیں باندات یک رژناہیں ءُ علمی چاگردے ءِ توکا زندگی بہ کنت۔
جھد پہ ھر کسءَ
اوست پہ بیوسءَ

Share

LEAVE A RESPONSE

Your email address will not be published. Required fields are marked *