Art & Literature

لنجیں شپ ءِ یاد: ناز بارکزئی

شپ تہار ات ءُ آزمان ءَ وتی سیائیں چادِر توامیں جہان ءِ سرا پِر داتگ ات ۔ استار وتی رژن ءَ چہ سک ملور اِت اَنت۔ ماه ءَ اوں زهر کُتگ ات ءُ دو شپ بیت آزمان ءَ اوں شر جوڑی کنگ ءَ نئیتکگ انت ءُ وتی زهری ءِ نمدی هر کُنڈ ءُ نیمَگ ءَ پِر شانتگ اَت… آزمان ءِ سرا جمبرانی ٹُُّکر چو کسانکیں گونڈوانی وڑا لیب ءُ گوازی کنگ ءَ اِت انت ۔ هما گونڈو کہ هر ترْس ءُ بیم ءَ چہ نا بلد لوگ ءِ کُنڈئے ءَ لوگ ءِ سامان ءُ اَزبابانی سرا لِیب ءُ گوازی کن اَنت.
آزمان ءَ سیائیں چادر ، اے میتگ ءِ سرا گُشے گیش سیائی ، تُرْس ءُ بیم ءِ یک تُوپانے پیداک کُتگ اَت…. کُچک ءُ تولگانی توار برے نزیک ءُ برے دُور ءَ چہ انچو سما بوہگ ءَ ات کہ کجا پُرس ءُ موتک ءِ یک هور تَوریں جان برْمشیں موسم ءِ وڑا هر لوگ ءِ ،هر مردم ءِ جان ءَ امباز کنگ ءَ انت ۔ اے میتگ ءِ سرا ملکموت ءِ یک خدائی ئےِ ات۔

میتگ ءِ درستیں لوگ آزمان ءِ وڑا اودے جاه مننداں سیائیں رنگ کرتگ انت…شپ کہ بیت اے میتگ ءِ زمین اوں سائیں گشان ءِ پر دنت…. اگاں کسے شپ وتی جاه ءَ اگاں روچ ءَ اوں بیت گڈا آئیءِ دل ءِ دِریکگ انچو گیش بیت کہ پالوگاں چہ دل در آئیگ ءِ پیم ءَ سما دنت ، پرچا کہ اودے جاه منند یک اَجبیں مہلوک ءِ چیر دستی ءِ آماچ ات انت ۔

روچ ء مروچی داں زانگ نہ بیت اے مہلوک جناور انت یا انسان انت اگاں درچک اِنت ۔ گُشگ بیت آ جناور انت سک بلاهیں دَپ انت اش ءُ آئی ءِ سک بلاهیں ءُ شِکّیں دنتان انت بلے میتگ ءِ مزن عمریں کماش گُش انت کہ ما کسان بوتگیں هما وهد ءَ مئے میتگ یک وشیں ءُ سک گل ءُ شادیں میتگ ءِ بوتگ ۔ اِدا کوه ءُ ڈوک ءُ ڈَل اوں بوتگ انت ۔ هؤر ءُ گوات ءَ تمامیں میتگ امباز اتگ.. ژیمپ ءُ کہور ءُ آپ مئے میتگ ءِ هر مَچ ءُ درچک ءَ سیرآپ ءُ سر سبز کرتگ انت ۔ همُک هؤر ءِ رند کہور ءَ هار داتگ ۔ کوکو ءُ کُلی ءُ شانتُل بے ترس ءَ برے آزمان ءَ برے زمین ءَ وتی توار ءَ مست ءُ شعر جنان ، برے درچک ءُ مچّانی سرا نشتگ انت ءُ برے کوه ءَ توّاپ کتگ اش ءُ آپ ءِ ورگ ءَ کہور ءَ اتکگ ءُ گوازی کتگ اش ۔

اناگہ شپ بیت ائلان بیت انچیں توارے بیت کہ آ انسانی لبزاں کارمرز کن انت بلے انسان ءِ مہ بیت دگہ جناور ءِ بہ بیت…ائیلان چوش بیت کہ اے میتگ ء سرا نوں مئے باروٹی انت…کسے اگاں سر چست کت گڈا باندا وتی لوگ ءِ چہ در اتکگ ما آئی ءَ نئیل ئیں ۔ نوں شمے واست ءَ آزمان چارگ یک بلاهیں جرمے ۔ اگاں نا شما روچ ءَ دیست کنے نیکہ شما شپ ءِ استاراں بہ لوٹ ات ۔ اگاں کسے مئے گپ نہ زرت گڈا آئی ءِ سزا سک ترسناک بیت ءُ ابید چہ ملکموت ءَ آئی ءِ گموار کس نہ بیت۔

پیروک چار شمبے گش ایت کہ آئی ءَ رند ءَ همے جناور ءَ نا روچ چار ات نا شپ هما مرد کہ سر چِست کنگ ءُ روگ ءِ ھیل دار ات بزان آ چہ میتگ ءَ گار کنگ بُوتگ ۔ داں روچ ءِ مروچی انگت کس نہ زانت کہ اے جناور ءَ مردم چست کتگ ءُ برتگ انت ، اے باریں وارتگ انت اش یا پشت کپتگ انت ۔ ایشانی بارو ءَ کس ءَ ھچ وڈیں سرپدی نیست ۔

گیش هما مرد کہ آئی ءِ منّوگر نہ بوتگ انت ءُ وتی کُمپ بئیگ ءُ سرا جهلاد کنگ مکن کتگ اش آئیانی روچ مروچی تک هال نیست… 70 سال رند نوں چک پیداک بنت اے گپ ءَ مات ءُ پِت پیسر اے جناورانی بابت ءَ سرپدی دئینت…بلے انچیں شیر دلیں مات ءُ پِت هم است کہ آئی ءِ منّوگِر نہ بوہگ ءِ پنت ءُ سوج کن انت ءُ بازیں پیداک بوہگ ءَ گوں آئیان ءَ کلمہ ءُ قران ءَ پیش کُمپ بئیگ سوج دئینت… پیرُک چار شمبے ءَ وتی هید ساپ کت انت ءُ وتی کُمپ ئیں بڈّا گوں پاد اتک ءُ وتی جاه ءَ شت ءُ وپت ۔

آزمان ء هما تہاریں گشان پِر داتگ ات..هما رژن ءُ ملور ءِ استار ات انت..هما لیب ءُ گوازی کنوکیں جمبر ، هما تولگ ءُ کچکانی اولاسگ ، میتگ ءِ سرا ہما سیاهیں گشان ، کسه انگت هلاس نہ انت ، چینچوک کرن ءُ دهر جنت ، اے کس نہ زانت… پیروک چار شمبے ءِ نماسگ وتی نماسگاں اوں اے کسہ گُش انت کہ داں اے جناورانی سرا وت یک هدائی کہر ءِ مہ کپ ایت ، اے داں ہما وہد ءَ مئے وس ءُ واک ءَ چہ ڈن انت ، ہچ زانگ نہ بنت ۔

Share

1 COMMENTS

  1. It’s still young with more hair volume, and this length is also OK! Let’s not talk about the picture, it looks natural to wear, and the hair quality is also very good, satisfactory

LEAVE A RESPONSE

Your email address will not be published. Required fields are marked *