Letter

کاگدے لُمہءِ وتن بانک کریمہ بلوچ ءِ ارواہءَ: شکیل بلوچ

!سہرچکیں سلام

بانک من سر پد نہ بان کہ کسہ آسر بوت یا نوک بندات۔۔۔۔۔بلے کسہ بندات بوھگ ءَ پیسر آسر بوت ءُ یک انچناھیں آسرے بوت کہ بازیں کارستے پروشت ءُ تُش تُش بوت ءُ ھما کارست کہ چو بولان ءِ کوہ ءَ مھکم بوتگ اَنت بلے ھما پروشت ءُ آزاگ بوت اَنت ءُ کسہ ءِ کارستان چہ یکے واجہ اے آر داد اِت کہ آ چہ اندر ءَ پروشت ءُ آزاگ بوت، گڑان مئے چہ بستار۔

“اکس کشگ آسان اِنت بلے درد ءَ چون کش ئے”
لُمہ تو زان ئے کہ تمپ انقلاب ءِبو ءَ کنت ءُ ھمے انقلاب ءِ بو سرجمیں بلوچستان ءِ باتن ءَ آتار اِنت ۔
تمپ ءَ سرجمیں سنگار ایں
مسک ءُ وشبواں آتار ایں۔

او! ھان ھما وھدا کہ وتن ءِ مھر تئی باتن ءِ مردم ءَ امبازیت تو پہ اے ھلاس نہ بوھکگیں مھر ءَ دیوانگ بے ءُ تئی وتئی کہول اِنت ۔
“دگہ راجےءِ زمین ءَ پہ زور ایردست کنگ یک لاچے،ھواسے ءُ وتئی سرزمین ءِ آجوئی ءِ جہد عشق ئے ءُ ھمے عشق ھر وڈا نزر بہ بیت بلے چہ لاچ ءَ ھزار سر گہتر اِنت ”
زمین ءِ عشق یک انچنائیں عشق ئے ھچ رنگ ءَ نزر نہ بیت۔
لُمہ ترا من ھبرے ءِ ھال دائیگ ءَ بے ھیال اوں۔
کہ تو یک نبشتانکے نمیرانیں سنگت ساجدحسین ءِ نام ءَ نبشتہ کتگ اِت۔

(مئے زندمان ھورک بوت)
من ءَ انچو گمان بیت کہ تو وتئی زند ءَ ھمے کسہ پہ وت ءَ نبشتہ کتگ ۔
تو زان ئے بلوچستان چہ تئی روگ ءَ رند چنچو پروشتگ ءُ ابیتک اِنت ءُ ادا چنچو کسہ نا سرجم بوت ءُ چنچو درد اَنت کہ بلوچستان ءَ وتئی باتن ءَ جاہ داتگ اَنت۔
لُمہ تو ءُ ساجد ھما گار ءُ بیگواہ بوتگیں سنگتانی نام ءَ 220 تاک دیمیں کتاب ءِ چن ءُ لانچ ءَ بوتگ اَنت کہ 2021 دینگا ءِ ھما انسان دوستیں مردمانی دیم ءَ ساڈا کن اِنت کہ چنچو بلوچ گار ءُ بیگواہ اَنت بلے۔۔۔۔۔۔۔۔
بلے نون آ کسہ کئے سرجم کنت ءُ اے گرانے بار ءَ کئے وتئی کوپگ ءَ زوری اِیت ؟؟
بقول ءِ ڈاکٹر ھنیف شریف ءَ سڈک ءِ سر ءِ سنگ ءَ کئی دور کنت ۔۔
اے یک گواچِیں ھبرے کہ کُل بلوچ کینڈا ءِ نام ءَ چنچو ھسد ءُ کینگ داراِیت ۔۔
“زانان درملک نہ ریچیت گل ءُ گوہر پہ من
بِل کہ من شاتان وتئی تنگہیں براتانی تہا”
بانک ترا زانان پہ نمیرانیں سنگت رضا ءُ کمبر امچو باز زہیر بوت کہ چو زوت مارا چور کت ءُ شت ئے ءُ انگتہ رضا ءُ کمبر ءِ کار سرجم نہ اَنت ،نون تئی کاران مئے نزوریں کوپگ کجا زرت کن اَنت ۔

تو سرپدئے کہ تئی زنگولیں کنٹ پہ استان ءَ یک ترسے ءُ انچائیں ترسے کہ استان اوپار کت نہ کنت ءُ تئی مانش پہ آئی ءَ ترس ءُ پہ بلوچ ءَ آشوب ءِ چیدگ۔۔

لُمہ گپ ءُ ھبر باز اَنت ءُ کسہ ھم ناسرجم ءُ کسہ تو چہ تہاریں کوٹی ءَ در کت ءُ بلے سرجم نہ کت ءُ شت ئے ءُ زاہد بیات ما چے بگش ایں لُمہ کجا شتگ ءُ پدا آئی چم ارس بان ءُ کئے آئی ءِ ارسانی بولی سرپد بیت ءُ کئے آئی ءِ ارسان نبشتہ کنت۔
کسہ ءِ گڈسرا من امچو گش آں
بانک تی ارواہ آسودگ بات ءُ درستیں نمیرانان سلام کن۔

نہ ملک ملکے نہ درملک وتئی ڈگار ءَ باتئے پرچا کہ تئی ڈگار تئی بھشت اِنت۔

Share

LEAVE A RESPONSE

Your email address will not be published. Required fields are marked *