Blog

میان اُستمانی روچ ءُ بلوچ بانڑی آہانی کرد: عالیہ شاہ

زالبول دنیا ءِ ڈولدار تریں بہرے زانگ بیت، زالبول بزاں کہ دنیا ءِ کساس نیم بہر ءُ زند ءِ جوڑشت منّگ بیت۔

دنیا ءِ ہر راج ءِ راجدپتراں زالبولانی وتی کرد ءُ ارزشت یے است اِنت، انچوشکہ ما اے گپ ءَ سرپداں ءُ زاناں کہ ہر راج ءِ توک ءَ زالبول ءَ ارزشت، بستار ءُ اگبال (رائٹس) است اِنت۔ ہر زندگیں راج ءِ راجدپتر ءِ توک ءَ چُشیں زالبول الّم است کہ آئی ءَ وتی جوانیں کرد ءُ کار ، کوشست ءُ جہداں چہ وتی ہستی منّیتگ ءُ وتا راجدپترانی بہر جوڑ کتگ، ہمے رنگ ءَ بلوچ راجدپتر ءِ تہءَ ہم یک جوانیں شیرزالیں زالبول بانڑی رند بلوچ کہ وتی بہادری ءُ مزن دلی ءِ سبب ءَ زانگ بیت ءُ راجدپتر ءَ آئی ءِ جہد ءُ نام داں مرچی ہم زندگ ءُ است اَنت۔

مرچی زالبولانی میان اُستمانی روچ اِنت اے روچ بزاں کہ ایوک ءَ مرچی زالبولانی شرپ ءَ ایر کنگ بوتگ مرچی یک ھسابے ءَ زلبولانی منّت ءُ ستا ءُ توسیپ ءَ ءُ آہانی جوانیں کرد ساڑاہگ بنت ءُ دیما آرگ بنت۔۔۔
زالبولانی میان اُستمانی روچ ءِ درگت ءَ بلوچ راجدپتر ءِ شیرزال ءِ بہادری، بستار، حق ءُ کرد ءِ بابت ءَ نبشتہ کناں ءُ وتی انوگیں اھد ءِ بانڑی آہانی ستا ءُ جہدانی ستا ءُ توسیپ کنگ المیّ اِنت، مرچیگیں میان استمانی روچ ہما شیرزالانی نام ءَ ندر اِنت۔۔۔

بانڑی رند بلوچ مزن شانیں چاکر ءِ گہار ءُ شیہک رند ءِ جنک بوتگ، پانزدھمی کرن ءِ رندانی ٹک ءَ چہ بوتگ، بانڑی رند ہما زالبول اِنت کہ آئی ءَ دہلی ءِ فتح کنگ ءِ جنگ ءَ بادشاہ ہمایون ءِ کمک ءَ گوں وتی 40 ہزار لشکر ءَ گوں بوتگ۔۔۔

فقیر شاد وتی پولکاری کتاب میراث ءِ تہا نبشتہ کنت کہ:
”پہ دہلی ءِ تہت ءِ واستا سال 1555ءَ ہمایون ءُ سکندر شاہ سوری ءِ درمیان ءَ 22 جون ءَ ماں سر ہند ءِ میدان ءَ اے تاریخی جنگ ءَ میر شہداد ولد چاکر گوں وتی ہژدہیں چُکاں ہم گوں بوتگ۔“ ( تاکدیم 30)
اے راجدپتری جنگ ءَ اول سکندر شاہ سوری سوبین بیت ءُ ہمایون ءُ چاکر رند ءِ بازیں مردمے جنَگ بیت ءُ لشکر سک نَزّور بیت گڑا چاکر وتی لشکر ءَ زوریت ءُ در کیت ءُ دیم پہ سیبی ءَ رواگ ءَ بیت کہ نیم راہ ءَ حیال کنت ءُ چاریت لشکر ءِ توک ءَ بانڑی گوں کساس نیم لشکر ءَ گون نہ اِنت:
”شر بچار اِت کہ منی نظر کُنٹّیں
کے اِد ءَ گون ءُ کئے نہ اِد ءَ گون نئیں
چو جواب داتگ لشکر ءِ مرداں
بانڑی گون اِنت گوں دوسد سواراں
بانڑی گون نہ اِنت گوں شِپیں دُرّاں“ (تاکدیم 35)

بزاں بانڑی گوں دوسد لشکر ءَ ہمودا جہلّیت ءُ شاہ ءِ دیم ءَ دریت، بانڑی گوشیت اے پہ منی سر ءَ عیب اِنت ءُ پہ منی قوم ءَ کہ بلوچ جنگ ءِ پڑّ ءَ تتکگ اَنت، راجدپتر ءَ پہ منی قوم ءَ چے بچیت اگاں من جنگ ءِ پِڑّ ءَ بہ تچاں چوشیں زند ءَ چہ جنگ ءِ پِڑّ ءَ مرگ گیشتر پہ وتی بالاد ءَ شات بیت۔۔۔ ساہ ءُ سر قربان پہ ننگ ءُ شان ءَ بلے پد نہ کِنزاں۔۔۔ شیر شاہ سوری آئی ءِ دست ءَ زہم ءَ گندیت کہ ھون پیٹگ ءَ آں، گڑا بانڑی ءَ گُْشیت کہ تو زالبولے ئے چہ منی دیم ءَ دور ءَ۔ بانڑی چو اے وڑا جواب گردینت ءُ شاہ ءَ را گُْشت:
چو جواب داتگ بانڑی ءَ شیہک
گوں ہما شاہ ءَ زہرکنی گال اَتگ
اگاں من جَنیناں تئی جَن ءِ ہَزماں
جَن ہماینت کہ میتگاں ننداں
پَنّ ءُ مُزواک ءُ ماہپَراں رنداں
گوں وتی مرداں دَز گُلائیشاں
من جَنیناں بہ مجلس ءَ نئیلاں“
(تاکدیم37)

اے شیئر ءَ چہ اے گپ پدر بیت کہ بانڑی چونیں تب ءُ چونیں فکر ءُ حیال ءِ زالبول یے بوتگ۔۔۔ وہدیکہ اُود ءَ چاکر ءِ لشکر ءَ میران واتر کنت پہ وتی مات ءِ کمک ءَ گڑا چاکر ہم وتی لشکر ءَ زوریت ءُ پدا دیم پہ دہلی ءَ روت۔۔۔ بانڑی گوں وتی سپاہیاں شاہ ءِ دیم ءَ دریت ءُ جنگ ءَ برجاہ داریت،
بانڑی ءِ چوش ءُ جذبہ انچو مُہر ءُ مہکم بیت کہ آئی ءِ مردیں سپاہی یک رندے پدا بانڑی ءِ بہادری ءِ سبب ءَ جوش ءَ کا اَنت وتی زہم ءُ اسپراں چست کناں، اے وہد ءَ بانڑی رند بلوچ 40 ہزار لشکر ءِ سروک ءُ رہنما بیت ءُ جنگ ءَ باج بارت ءُ دہلی ءِ تہت ءَ گِر اَنت۔۔۔

مرچی اے بابت ءَ گپ ءُ تْران ءِ مول ءُ مراد اِیش اِنت کہ مرچی زالبولانی میان استمانی روچ اِنت، ہر زندگیں ءُ تہذیب یافتیں قوم مرچیگیں روچ ءَ وتی ہما زالبولاں الّم یات کناں ءُ سلام پیش کناں ءُ آئیانی جہد ءُ کوشستاں دیمءَ کار اَنت ءُ ستا ءَ کنت کہ مرچی راجدپترانی بہر جوڑ بوتگ اَنت، ایوک ءَ راجدپترانی بہر اَنت بلکیں راجدپترانی روژنائیں چراگ ءُ سْرپتگیں پُلّ جوڑ بوتگ اَنت۔۔۔ بلوچ راجدپتر ءِ تہءَ ہم شیرزال است اِنت ءُ بانڑی ءِ دْروشمیں شیرزال آں سلام پیش کناں۔۔۔

گُْشگ ءِ مول ءُ مراد اِیش اِنت کہ مرچی جنین آدمانی میان اُستمانی روچ اِنت، ہر بلوچ زالبول ستا کنگ بہ بیت، ہما زالبولاں کہ وتی زند وتی لوگ ءُ چکانی سرا ندر کتگ وتی وشی ءُ واہگ کُشتگاں ءُ وتی لوگ آباد کُتگ اَنت آئیاں سلام اِنت۔۔۔ ءُ ہما زالبول کہ راجی جہد ءُ جفاں گوں براتاں ہمکوپگ اَنت ءُ بانڑی ءِ وڑیں قربانی داتگ ءُ دئیگ ءَ اَنت آئیاں ہم سلام اِنت۔۔۔

چوشکہ بلوچ ءِ زندمان جنگ ءِ پِڑ ءَ چہ کمتر نہ اِنت، ہمے زالبول کہ زی نزّور ءُ بے وس بوتگ اَنت مرچی گوں بدواہگاں حق ءِ لوٹگ ءَ دگانی سر ءَ در کپتگ اَنت وتی نازرکیں کوپگاں آجوئی ءُ حق ءِ جہد زورتگ ءُ نرمزاریں براتاں گوں مرچی ہم سر، ہمکوپگ ءُ ہمگام اَنت۔۔۔

میان اُستمانی روچ بلوچ قوم ءِ ہر ہما زالبول ءِ نام ءَ کہ زند ءِ وشیں ساعتاں چہ زبہر اَنت ءُ بدواہگانی دیما درکپتگ اَنت۔

بانڑی رند بلوچ راجدپتر ءِ اولی شیرزالیں جنین آدم اِنت کہ آئی ءَ پہ دری بادشاہ ہمایون ءِ تہت ءِ ہاتر ءَ گوں آئی ءَ ہمراہداری کتگ، وتی لشکر ءِ ھون ریتکگ۔۔۔

گڑا سر ءَ گُشگ لوٹاں کہ اے سال ءِ میان اُستمانی روچ بلوچ راج ءِ درائیں بانڑی آہانی نام ءَ ندر اِنت کہ پہ وتی قوم ءِ ہمک جیڑہ ءُ جنجالاں ہمراہ اَنت، شہید بانک کریمہ ءِ جہد پہ بلوچ قوم ءِ واستہ ہچبر ڈالچار کنگ نہ بیت، کہ آئی ءِ جہد ءَ یک جُنزے دیم ءَ بُرتگ ءُ چینچو بانڑی ودی کتگ آ استیں وہد ءِ بانڑی ءُ مادر ءِ وتن ءِ نام ءَ زانگ بیت آئی ءَ مرچی چتور بے حیال کن اِت، ہمے رنگ ءَ بانک کامریڈ مہرنگ بلوچ یک انچیں نامے کہ آئی ءِ جہد ءُ توار ستاکرزگ ءِ لائق اَنت، اگاں بانڑی رند ءَ دہلی ءِ جنگ ءَ سروکی کتگ گڑا مہرنگ بلوچ ہر وڑیں جیڑہ ءُ جنجالاں گوں وتی براتاں ہمکوپگ ءُ ہمگام اِنت، بانڑی یک زندگیں چیدگے ہر بلوچ زالبول ءِ تہا بانڑی زندگ اِنت ءُ است اِنت۔۔۔
#WomenDay

Share

LEAVE A RESPONSE

Your email address will not be published. Required fields are marked *