Art & Literature

ودار ءِ گرانیں ساعت: عالیہ شاہ

مارشت
دانکہ تو منی کِرا اَت ئے من تو مدام جنگ کُت زہر بوتاں، بلے ہمے زہری ءُ جنگ ءِ نیام ءَ من تو انگت ءَ پہ یک ءُ دومی ءَ ہدوک ءُ واہگ مند اِتاں، تئی مہرانی بہشت ءُ وش لذّتیں نیادانی واستہ دل گنوک اَت۔

تو ہم پہ من زروک اَت ئے تئی دائم ءَ واہگ اَت کہ گوں من نیاد بہ بیت، زندءِ ہمک ساعت گوں منا بہر کنگ لوٹ اِت ءُ مدام گوں من وتی ہرچی بہر کُت، بلے زند ءُ وہد ءَ مارا اَنچو سِست ءُ جتا کُت گُشئے دژمن اَت ءُ کہریں وہد ءَ مئے نیام ءَ مان کشے مان کُت۔

من نا زاناں کہ ترا چہ من کہ ءَ جتا کُت زورکیں وہد ءِ تمردی اَت یا منی مہر ءِ نِزّوری اَت کہ من تو چو دریا ءِ کنارہ بوتاں، ھوار سفر وَ کناں بلے نوں ہمسفر نہ باں۔

من چو تُنیگیں زمین ءَ تئی ودار ءَ نیشتگ آں کہ کدی پدا تئی مہرانی ھَور گواریت، کدی منی ہوشامیں جبین سیر آپ بیت، کدی باریں من چو گلزمین ءِ سْرپتگیں پُلّ ءَ سرپاں۔ نوں باریں کدی پدا منی وشیں بوہ ءَ وتی جیگ ءَ سمار ئے۔

تئی جتائی ءِ تراول اَنت دل ءِ سرا درد بنت ءُ من ءَ ہما روچانی یات کا اَنت کہ من ترا گُْشت بِل منا یلہ دئے بُرو، بل منا کہ تہنا باں تو بُرو پہ منا مہ نند کہ من پہ تو نہ آں۔

بلے مرچی! من جیڑاں کہ تو منا پرچا موکل نہ دات، یک ساعت یے ءَ اگاں من زہر اَت آں پدا وش وَ بوتاں، مرچی من نیشتگ آں کہ اے نود ءُ ساچان پدا ترا پہ منا بیاراں۔ کہ نوں ترا بیاریت ءُ پہ من ءَ سر بہ کنت، یک برے تئی دست ءَ منی دست ءَ بہ دنت، چُکاں ترا چماں داراں دل ءُ ساہ ءَ وتی پہ تو کُربان کناں، یک رندے بیا منی تُنیگیں ارواہ ءِ تُن ءَ پْروش۔۔۔ زرد ءِ تہاریں دمک ءُ کِشکاں پدا وتی پُر مہریں چراگاں گوں رژن ءَ بکن۔ چونیں بے نپیں ودارے کہ زند ءِ ہمک واہگ منی مِران اَنت۔

من زاناں کہ نوں تو پہک نیا ئے۔۔۔ زاناں کہ اے ودار ءِ گرانیں ساعت زرد ءَ آس پِر دارنت۔۔۔ تو منی استیں وہد ءِ آگہی ءِ واب ئے ءُ زیکیں دؤر ءِ وشیں وہد ءِ۔

Share

LEAVE A RESPONSE

Your email address will not be published. Required fields are marked *