Book Reviews

گدانءِ ردانک تاک: عمرعثمان

تاکبند “گدان”ءِ چارمی تاک پہ ردانکءِ بابتءَ جوانیںءُ ارزشت داریں گچین تا ک ات۔اے تاکءَ پہ ردانکءَ باز جوانیں باوست جست کنگ بوتگءُ آئیءِ گیشواریءُ دیمروئیءِ بابتءَ جوانیں لیکہ دیما آرگ بوتگ۔بلے منا واجہیں شونکارءِ یک گپےءَ سک حیرانءُ ہجکہ بوتگاں کہ شونکار بلوچی ردانکءَ دنیاءِ ایندگہ زبانانی ردانکءِ سرپءَ اوشتارینت کہ آہاں کرنانی کرن پرے سفرءَ گوازینتگ۔دنیاءِ تہا لبزانکءُ لبزانکءِ تہراںسے روچانی تہا دیمروئی نہ کتگ بلکیں آہانی یک دراجیں راجدپترءِ دنیاءِ دیما سہرا انتءُ نوں وتا مزنیں جاگہے گپتگ۔

اگاں ردانکءِ درگتءَ بلوچی لبزانک چارگءُ پوہ کنگ بہ بیت۔مئے لبزانک ردانکءِ بابتءَ گوکو انت ، بلے اے امیتءَ کشاں کہ یک روچءِ ترّیتءُ تچیت ہم۔

کواسےءِ گشگ انت وہدءِ روسءِ تہا شریں لبزانک نبیسگ نہ بوت گرا ہما دورءِ واجکارءَ جار پرّینت کہ اگاں ہر زانتکارءِ زبانءِ دیمروئیءَ جوانیں ردانک نبشتہ کنت من گورآئیءَ زرءُ تلاہاں توراں۔ چہ ہما روچءَ رشین لبزانکءَ انقلابءِ ودی بوتءُ روچءِ مروچ ہمک لبزانک دوست رشین لبزانکءَ ڈالچار کت نہ کنت، بلے ادا گپ زبانءُ قومےءِ بوہگا انت۔ روس وتی واجہ وت ات۔بلوچی غلامیں قومےءِ زبان انتءُ پدا آئیءِ ردانکی سفر ایوکا ہپت دھکانی محتاج انت کہہ اے عمرءَ تمردیں مرد وتی سہمی جنءَ گیپت۔ (خیر اے انوں بنگپ نہ انت) بلے درورے بوت کنت۔

مُردنی پہ ماتی زبانءَ اے ترسناکیں ویلے بوت کنت کہ آئیءِ وانندہیں ورناءُ کماشیں کواس وتی ماتی زبانءَ نبشتہ کنگا میار کن انتءُ منی حیالءَ اے ذہنی غلامیءِ گڈّی تبک انت کہ چریشیءَ پد ہچ چیز پشت نہ کپیت۔کواساں گوں نندگءُ اے بابتءَ سدکی دئیگ انت کہ ماتی زبانءَ نبسگءَ پونز نہ پروشیت بلکیں تئی ارزشت گیش بیت۔
ہستیں عہدءَ بلوچ قومءَ انچیں زانتکارءُ کواس بازانت کہ آ چہ ایندگہ زبانانی کواساں ہچ پیم چکءُ پد نہ انت بلے سد حیف ہمے گشگ کپیت کہ آ کم مارشتیءِ آماچ انت کہ بلوچی زبانءُ لبزانکءَ کے وانیت بلے اے وہدءَ افریقہ نبشہ کار عبدالرزاق گرناہ ٹوہیں درورے کہ ہستیں نوبل داد وتی ماتی زبانءَ ارزشت دئیگا پہ واجہءَ رستگ۔آئیءَ ماتی زبانءَ نبشتہ لجءُ میار نہ بوتگ کہ مرچی ماتی زبان پرائیءَ پہر جوڑ بوتگ۔مئے زانتکار دری زبانءَ نبشتہ کنگا پہ ہمے حاطرا سنٹارو انت کہ آہاناں آہانی زانتءُ سما لاپءُ پجار دئیگا انت۔

آ اے گپءَ بے میم انت کہ آ وتی چم لنکک جنئگا انتءُ دگرانی چماں رژنءَ کنگا انتءُ ہردیں آ کور بنت پدا آہانی دزگروک آئیءِ جندے راج انت۔

گدان ردانکءِ بابتءَ باز محکمیں تاک ات۔ہمک نبشتانکءِ وتی ساچشتی ارزشتءُ لذّتے، بوت کنت من وتی گپانی تہا گدانءِ نبشتاکانی ارزشتءَ آ رنگءُ دروشمءَ شیکارت مہ کناں چشکہ یک جوانیں نبشتہ کارےءِ لیکہ بہ بنت ءُ تاکءِ وانگءَ پد سنگتےءِ دلءَ چست بوتگیں پاہار بہ بنت۔

بلوچی ہمک تہر ساچگءُپہازگ لوٹیت، بلے کم وہدءَ کمیں ردانکانی بابتءَ جوانیں نبشتانکءِ ساچگ ہمے سہرا کنت کہ بلوچی لبزانک اوشت آماچ انتءُ نیکہ کُرک انت۔اگاں کسے چشیں واہگءُ اومان وتی دلءَ داریت۔اے آئیءِ جندے کمزانتیءُ کم ظرفیءِ چیدگ انت کہ آ چہ بلوچی لبزانکءَ دوریءِ سببءَ ودی بوت کن انت۔

چشکہ بلوچی لبزانکءَ ردانکءِ تہا گدارءِ سفر 1976ءَ سیدءِ نازکءَ چہ بندات بوتگ،بلے دومی گدارءِ نبیسگءَ کساس 11سال گوستگ کہ سرجمیں دھکےءِ سفر انت اگاں ہمے نیامءَ زالبولےءَ جنکیں زہگءِ بیاؤرتیںءُ بلوچی لبزانکءِ درور کتیں ہمے جنکیں چک کہ گرمیں دمگاں جنک زوت جنین بیت جنین بوتگ ات،بلے وہدءِ ردانکءِ سفر (مراد گدار انت)ءِ سہمی دھک کہ 2000ءَ بندات بیت(دومی دھک 90 مراد انت) ادا واجہ منیر بادینی سابءِ ہمراہیءَ بازیں نوکیں ورنا گوں نوکیں بنگپاں دیما کہ تنیگہ آہانی سفر برجاہ انتءُ امیت ڈیوا گیش بلان انتءُ داں بلوچءِ مانیت ردانکءِ دیما کسے اوں چگردی پل ئے بست نہ کنت۔ءُ گڑیءَ منی وانندہیں بلوچاں عرض ہمیش انت کہ گدانءِ اے تاکءَ وتی وانگءُ لائبریریءِ زینتءَ پہ ہژدری بزان انت۔

بلوچ، بلوچیءُ بلوچستان ابدمان بات

Share