Letter

نمدی ایں پہ لمہ ءِ وطن ءِ نامءَ:بانک زھرا بلوچ

دروْت ءُ سلام منی بانکیں لمہ۔
“ملک ءِ وتی سوچاکیں لِوار ءِ موسم
دٙر ملک ءِ سارتیں سمین ءٙ شٙر تر انت”
پچنیں آزمان ءِ ساھگ ءَ گلیں زمین ءِ باتن ءَ لھتیں مردم پہ گار ءُ بیگواہیں مردمانی پد جنگ ءَ  شال ءِ سارتیں دلبند ءَ آس روک کتگ ءُ نشتگ اَنت بلے۔۔۔۔۔۔۔۔۔۔۔۔۔۔
لمہ بلوچ ءَ چہ کرنان یک انچیں دگہ گچین  کتگ ءُ پند بروگ ءَ اِنت کہ اے دگہ ءِ سرا کوہ،کرود،کور ،کوچگ ءُ آپ ءُ شیپ ءُ دگہ ھزارانی کساس ءَ اڑ ءُ جنجالانی دیمپان اَنت بلے بلوچ ءِ کاروان جنزان  اِنت ترا چہ رند تئی سر ءُ سوجءُ پنت ھمک چک ءَ باتن ءَ رستگ اَنت ءُ گون کاروان  ءَ راھی اِنت ۔ انچو کہ قاسم فراز گیشت
شپ ءَ کروج زِر ءَ مان بدار اسپ سوار
چو دل نہ جیڑاں کدی سرمچار اسپ سوار
تر ءَ چہ رند نہ اوشت ایت اے جنگ دنیا
تر ءَ چہ رند ہوں کیت انت ہزار اسپ سوار
لمہ تئی کاروان  الم ءَ جنزان  کنت بس کاروان  ءِ کارست بدل اَنت بلے کاروان  ھما اِنت جنزان اِنت ۔لمہ من لوٹاں کہ پہ ترا کاگد ءِِ  نبشتہ بکن ءُ روان بدے آں  ابید چہ لھتیں  سبزارنگیں دانکہ ءَ دگہ ھچ نیست ۔من ءَ انچو امیت اِنت کہ تو باگیں بھشت ءَ ھم گون سنگت ءُ ھمبلان ھم دیوان ئے ۔
منی راہبریں لمہ !
بکش  ھال ءِ دیگ ءَ بہ ھیال اوں کہ انوں اھسان ارجمندی 12 سال ءُ 20 روچ ءَ رند چہ استان ءِ بندگیں جاھان آجو بوتگ آئی ءَ بندگ جاھ ءِ کسہ کتگ سک باز گرانیں ساھتے بلے آ گشیت کہ ھیمنہ ءَ نامیں شیرزالے بندگیں جاہ نمیران بوتگ بلے آئی ءِ نام ءُ توار ادا ھچ کس ءَ اِش نہ کتگ ۔
ھو ھان آئی اے ھم گپ کت کہ  بانک زرینہ مری ءُ ڈاکتر دین جان ءِ توار آئی ءِ گوشان کپتگ آ انگہ استان ءِ بندگیں جاہ بند اَنت ۔
لمہ استان وھدے کہ مردمان تئی وش اتک کنگ ءَ نیشت گڑا من ءَ جورج آرئیل ءِ 1984 کتاب ءِ ھما کارست گیر اتک کہ وھدے استان آئی ءَ را زندانی کنت ءُ سک باز لٹ ءُ کٹ کنت گڑا آ گشیت کہ اگان تو من ءَ گش ئے بلے آ نظریہ کہ منی راج ءِ باتن ءَ رستگ آئی ءَ تو ھلاس کت نکن ئے ءُ آ مارشتان تو ھلاس کت نکن ئے ءُ منی ھون ءِ وش بو زمین ءِ دلبند ءَ کہ تالا بنت اے ھون ءِ آتاریں بو ءَ تو ھلاس کت نکن ئے ءُ انچو کہ استان تئی وش تک کنگ ءَ راج ءَ نیشت آ دل ءَ جیڑایت کہ من لمہ ھلاس کتگ بلے لمہ ءِ نظریہ ءَ ھچ وڑ ءَ ھلاس کت نکن ءُ اے مارشتان کوشت نکن ءُ تئی ریتکگیں ھونانی وشیں بوہ ءَ ھلاس کت نکن ءُ تئی داتگیں پنت ءُ سر ءُ سوجان ھلاس کت نکن تئی راجدوستی  ءِ پنت راج ءِ باتن ءَ است ءُ ابدامان اَنت دانکہ بلوچ راج مان اِیت تو زندگ ءُ نمیران ئے لمہ ۔
مھروانیں لمہ !
من ءَ نمیرانیں سنگت رسول جان ءُ شے مرید ، شھدار ءُ تئی بچکند مدائم گیر کاہ اَنت ءُ لمہ اگان اے نمدی ترا سر بوت نمدی ءَ بوان ءُ الم نمدی ءِ پسو ءَ روان بدے کہ منی چم پہ کاگد ءِ پسو چو تن ءَ گیمرتگیں دْرچک ءَ وداریگ اَنت ۔
لمہ تو ھم سرپد ءِ تئی نمیرانیں جون پہ استان ءِ واستہ یک بیم ءُ ترسے انچون کہ بلوچ ھان ءِ جون ءَ کہ گوک پروش ءَ جنگ ءَ بلوچ ھان چہ کولواہ  ءَ سفر کنت ءُ گون انگریز  ءَ جنگ کنت آ جنگ ءَ شھید کنگ بیت بلے انگریز  ءِ لکشر آئی ءِ جون ءِ کرا ھم از کن اَنت کہ بگند ءِ زندگ اِنت بلکہ ءَ پد بیات ءُ مارا ارش بکن ءُ بہ جن۔
انچو استان ھم چہ تئی جون ءَ ترس ءِ آماچ بوتگ ءُ ھچ مردم ءِ کر ءُ گورا روک ءَ نھیشتگ کہ تو سر ءُ سوج بکن ئے کہ منءَ چہ رند ھم اے کاروان  ءَ اوشت ءِ آماچ بوھگ ءَ میلت اَنت ۔
لمہ وتن!
ترا نمیران بوھگ ءَ رند بلوچ نودربر گل آزاد ءَ ترا لمہ ءِ وتن ءِ نام سوگات کت کہ تو پہ بلوچ زالبوالاں  نہ بلکہ پہ دنیا ءَ آشوب ءِ چیدگے ئے ءُ سال 2016 ءَ تئی نام چو دْرپوشکیں استال ءَ دنیا ءِ ایدگہ 100 آشوبی شیرزالانی گو ھوار ءُ نہ پہ بلوچ زالبوالاں بلکہ پہ دنیا ھما ایردستیں راجانی واستہ یک چیدگے ئے۔
لمہ تو باگیں بھشت ءَ ھم پہ زائد جان ءُ زاکر جان ءُ زرینہ مری ءُ پہ ایدگہ گار ءُ بیگواہیں بلوچانی آجو بوھگ ءِ واستہ جیڑگ ءَ ئے ۔
لمہ من ءَ پھل کن !
تئی نمیران  بوھگ ءَ رند نندانک ءُ روانکانی رنگ ءُ دروشیم بدل بوت اَنت پرچا کہ انون کاروان  ءِ کارست بدل بوتگ اَنت ءُ چہ سر زھر ءَ آشوب تبیں مردم اَنت بلے چہ اندر ءَ چو رمیز وراتگیں دار ءَ ھشک ءُ ھالیگ اَنت ءُ ھو ھان لمہ انون گوادر ءَ ملا ہداہت اللہ  ءَ 20 روچ ءِ نندانکے کتگ بلے پیس بک ءَ ھر مردم ءَ وتئی وتئی گپ ءُ گال کتگ اِنت ءُ لمہ انون انچیں  وھد ءِ کہ بنی آدم  ءَ را وتی گوار ءِ پشک ءِ کرا ھم ترس اِیت ءُ بس ترا چہ رند یک شیرزال ءُ بانکیں گھارے است کہ آشوب ءِ روتگان آئی ءِ باتن ءَ سر چوڑ کتگ ءُ ما مدام بلوچ ءُ بلوچستان ءِ انوگیں جاور ءُ ھالانی ردا گپ ءُ ھبر کن ایں ۔
مھروانیں لمہ !
پھل کن کہ گپ ءِ ھال دائیگ ءَ شمشکار  آں ۔لمہ من جیڑگ ءَ اِت کہ پہ ترا کاگدے نبشتہ بکن ءُ روان بدے آں بلے شپ بہ وھد اِت ءُ چمان جواب دات ،واب ءَ دیست کہ تو من ءَ کال کت کہ شمے داروگس (ھاسٹل ) بند بوت ؟
من ! ھو گڑا تئی دومی جست اِت ؟
گڑا تو چہ داروگس ءَ دراتک ئے ءُ کتاب ھم در کت اَنت ۔
من !ھو انچو بست کت کہ کجائے تو ءُ کجا آں من گڑا ھمے ساھت ءَ من ءَ عطا شاد ڈگری کالج ءِ ھاسٹل گیر اتک ءُ پدا چمانی واب بیگواہ بوت ءُ ند ءُ کاگد زرت چار دانکہ نبشتہ کت لمہ تو کہ کتابانی جست کت من ءَ نمیرانیں سنگت کمبر جان ءِ ھما گپ گیر اتک کہ گشتگ ات کہ یک انچیں وھدے کئیت بلوچ ءِ لبزانک پہ استان ءَ سگار ءُ تپنگ جوڑ ءُ مرچی ھما وھد ءُ ساھت اتکگ اِنت ۔ھو عطاشاد ءِ ھاسٹل ءِ کتاب ءُ نمیرانیں سنگت ماسٹر علی جان ءِ کتاب استان چہ وتئی ترس ءَ زرت ءُ بن دات اَنت بلے آ کتابانی مارشت بلوچ راج ءِ اندر ءَ زندگ است ءُ ھیات اَنت ۔
اگان تو بزان ئے کتاب ءِ بستارءَ
درائیں دنیا تئی سیاھگ ءَ جل اِیت
ترا گپے بگشان ؟
ھور زند ءِ مستاگ اِنت
گندے ھور ءَ رند زمین یک بوئے کنت من پہ زمین ءِ ھمے بو ءَ شیدا آں۔
ھون ءِ بوہ ءَ کنت نمیرانیں ھمبلانی ھون ءِ بوہ ءَ کنت۔
لمہ مدام سلامت مھروان  بات ئے ترا تئی اولی سال روچ مراد بات ءُ ایدگہ سنگتان سلام کن ۔
Share