Blog

جیمز ویب استار: داد شاشانی

اِمرُوز ءِ گِران بھائیں آزمانی دورگند ءَ کربانی اساب ءَ چَہ دور یک روژنائیں استار ءِ اکسے کَش اِتگ ءُ دیم داتگ پہ ناسا کارجاہ ءَ۔

اے اولی اکس اِنت کہ ھمے دورگِند ءَ کَشتگ ءُ دیم داتگ اے دورگند ءِ نام اِنت ” جیمز ویب ”
اِمرُوز ءِ گِران نھادئیں دورگند ءِ دیم داتگیں اکس ءَ سائنس دان ھیران کُتگ اَنت۔

اے اکس دہ لاک میل بزان 16 شازدہ ھزار کلو میٹر ءَ چَہ دور کَشگ بوتگ سک باز دور یک استارے آزمان ءَ چو روچ ءَ روژنا ءُ دْرپشگ ءَ اِنت انچو گندگ بیت اکس ءِ تھ ءَ۔

ناسا ءَ اے دورگند تاکشان ءِ (دسمبر 2021) گُڈی ءَ گوں یک راکٹے ءَ آزمان ءَ دیم داتگ چَہ زمین ءَ دہ لک دور اے دورگند یلہ کنگ بوتگ دانکہ آزمان ءِ راستی ءَ گوں شَریں وڑے ءَ پٹ ءُ پول اِت بہ کنت چَہ ایشی ءَ زانگ بیت کہ زمین ءَ چَہ روگ ارزان نہ اِنت۔

اے پٹ ءُ پول ءِ مُراد ھمیش اِنت کہ ما بزان اِیں اِمرُوز چون جوڑ بوتگ ءُ کدی جوڑ بوتگ چِنکس پِراہ ءُ شاھگان اِنت۔

سائنس دانانی گْوشگ اِنت کہ اِمرُوز یک مزین تراکے ءَ پد جوڑ بوتگ ۔ سائنس ءِ زُبان ءَ آ تراک ءَ را گْوش اَنت ۔
“بگ بینگ”

بگ بینگ ءِ پکر ھم وشیں سسّا یے سائنس دانانی گْوشگ اِنت کہ ارب ءُ کرب سال ءَ پیش نہ استار بوتگ نہ کہ ماہ ءُ روچ ، آزمان ءِ ھم جند نہ بوتگ بلے یک بلائیں گولیں شے یے بوتگ ۔ یک روچے وتی ھمے تھی گرم ءُ سرد ءُ سُر ءُ پُرانی سوب ءَ تْرک اِتگ۔

ایشی درور ءَ چُش دنت سائنس۔
یک گواتو یے بزان اُپُّوکے چَہ آپ ءَ پُر کن پد ءَ کم کم ءَ کَجّ ئِے ھمے کَجّ ءُ پِرنچ ءِ توک ءَ کہ اُپّوک ترک اِیت آئی ءِ توک ءِ آپ چون تْرینزُّک گِر اَنت انچو گولا تْرک اِتگ اے ماہ ءُ روچ ءُ استاراں تْرینزُّک وارتگ ءُ یک یک بوتگ اَنت اے ھما گولا ءِ ٹُکّر اَنت۔

انگت ھمے وڑ بیگ ءَ اِنت نوک نوکیں استار جوڑ بیگ ءَ اِنت کوھنیں ھتم بیگ ءَ اَنت۔

سائنس نوں ھمے راز ءَ زانگ لوٹ اِیت کہ سبب چے اِنت چُش بیگ ءَ اِنت ناسا ءِ دورگند ءَ کہ اے استار ءِ اکس زمین ءَ دیم داتگ آ استار چَہ اے ستاراں سد اِنچو مزن اِنت ءُ روژنا اِنت بلے مئے چم ءَ گندگ نہ بیت ما دیست نہ کن اِنت ئِے پرچاکہ مارا چَہ سک باز دور اِنت ھمے استار ءِ کہ اکس دیم داتگ اے چَہ زمین ءَ دو ھزار نوری سال ءَ چَہ دور اِنت۔

” نوری سال ” روژناھی یک سالے ءَ سپری کنت ھمیش ءَ گْوش اَنت نوری سال۔۔۔۔ ”
روژناھی ءِ تیزی ءُ رواج چُش اَنت۔۔۔۔
یک لک ءُ ھشتاد ءُ شش ھزار 86 میل یک کترھے ءَ (سیکنڈ ) گوں تیزی ءَ سرجم کنت۔۔
گُمان اِنت کہ یک سالے ءَ اٹکل ءَ شش 6 ٹریلین میل ءِ سپری کنت۔

دو ھزار نوری سال انچو مزن بیت کہ ھمے کِرا اساب کنگ ءَ پہ انگت چُشیں اسابے جوڑ نہ بوتگ ءُ نیست بے کَچ ءُ کساس۔۔۔۔ بلے اے استار ءِ اکس ءِ سر ءَ ما گپ ءَ اِیں اے چُش ھم نہ اِنت کہ اِمرُوز ءِ گُڈی اِنت اِمرُوز ءِ میان ھما اِنت کہ ما گپ ءَ اِت گولاے بوتگ ءُ تْرک اِتگ بزان ” بگ بینگ ” بوتگ چَہ ھمے جاگ ءَ ھم لک ءُ ھزارانی نوری سال ءِ اساب ءَ دور اِنت۔

اِمرُوز بے کِساس اِنت مردُم ءِ زانت ءَ چے سائنس دان ھمے دورگند ءَ چَہ کہ نام ءِ جیمز ویب اِنت وتی زانت گیش ءُ مزن کنگ لوٹ اَنت۔

اِمرُوز ءِ شاھگانی اٹکل چُش بہ جن اِت کہ روچ ءِ ودی بوگ ءَ را اربانی اساب ءَ گیش سال گْوستگ انگت بلے انچیں بازیں استار ھست کہ آیانی روژناھی مارا داں سر نہ بوتگ انگت آیانی روژناھی راہ ءَ اَنت بزان پیداک اَنت نوکی بلے سر نہ اَنت اُمیت اِنت کہ کایاں سر بنت۔

جیمز ویب اے وھد ءَ اِمرُوز ءِ مستریں گِران بھائیں دورگند اِنت۔ ایشی پہ آڑ کنگ ءَ دہ 10 ارب ڈالر لاگت ھرچ بیتگ۔ ایشی جوڑ کنگ ءُ تیار کنگ ءَ گوں ناسا ءَ ھور یورپ ءُ کینیڈا ءِ آزمانی جُھدکاراں مزیں کُمک ءُ مدتّے کُتگ گوں۔ دورگند ءِ بُنپد 21 فٹ آدینک اِنت انچو کہ چو سُھر ءِ سنگ ءَ جوڑ کُتگ ھمے آدینک 18 ھشدہ بھرانی توک ءَ اِنت یک راکٹے ءَ کُتگ ءُ آزمان ءَ دیم داتگ آدینک چو چتری ءَ بند بوتگ دانکہ وتی گُڈی جاگ ءَ سر بوتگ نوں چو چتری ءَ ھشدھیں 18 آدینک پچ کنگ بوتگ اَنت چو مزیں آدینک ءَ ھور ءُ یکجاہ کنگ بوتگ اَنت آدینک وش وش ءُ زیبائیں اکس کَش اِیت ءُ دورگند اکساں تیار کنت ءُ زمین ءَ دیم اِش دَنت دورگند وت گْوش اِیت کہ آدینک ءَ را کُجام چیز ءِ نیمگ ءَ گیش جُھد کنگ دوست بیت۔

جمیز ویب دورگند ءِ کار کنوکیں یک سائنس دانے جین ربگی ءِ گْوشگ اِنت کہ اے دورگند مئے چمانی روژنائی ءَ چَہ گیش روژنائیں اکس کَشگ ءُ دیم دیگ ءَ اِنت سائنس دانانی گْوشگ اِنت کہ اے دورگند باز گوستگیں دور ءُ باریگانی راستی ءَ پدر کنت مارا سک باز مدت کنت پٹ ءُ پول ءَ پہ امریکہ ءِ ریاست میری لینڈ ءِ شھر بالٹی مور ءِ قائم سپیس ٹیلی اسکوپ انسٹی ٹیوٹ ءِ یک سائنس دان ءِ کلیس پونٹوپیڈن ءِ گْوشتگ اے آزمانی دورگند چوناھیگا ٹائم مشین ءِ وڑ ءَ اِنت پرچاکہ روژناھی اِمرُوز ءَ یک ھدے ءَ دان سپری کنت مارا اِمرُوز ءِ چیز ھما وھد ءَ گندگ ءَ کایاں کہ روژناھی بیت ما نوں گند اِیں چیزاں
سائنس داناں ءَ ھمے اُمیت کِتگ کہ جیمز ویب ءِسوب ءَ ما ھمے روژناھی ءَ ھم گند اِیں کہ انگت مارا داں سر نہ بوتگ نوکی پیداکیں دوھمی ھما وھد ءَ ھم زانگ لوٹ اِیں کہ مزین گولا ءِ تراک ءَ پیش چے چے بوتگ چون چون بوتگ اِمرُوز چون جوڑ بوتگ ءُ پراھ ءُ شاھگان بوتگ۔

Share